1 Chronicles 5
Rubengo hani
1Ruben aga te Jekopgo gomunai ogwa da, Jekop aga gasa nogi Israel. Tialima agai te aga ayago we me deli dali pagela piali. Tama sę yaligo, aga te gomunai ogwa wabo nogi sabeo. Menio. Te aga ama Josepgo ogwa dabego te nogi salio. Tama tialima te Israelgo ogwa dabego nogi elalubo madide, te Ruben polalubo gomunai ogwa nogi elalube dao. a 2Mu tama, Judago genuai nogi aga ama dede tomode elaluali, tiali goli Josepgo nogi ugwanu igulama, te gomunai ogwa nogi tiwai elaluai dao. b 3Rubengo ogwa dabego nogi e tiwai da, te Israelgo hasia ame nani ogwago ogwa dabe te tiwai elalubao, Hanok, me Palu, me Hesron, me Karmi dao.4Joelgo hani e tiwai dao. Joel te Semaiago aya, tama Semaia te Gokgo aya, te Gok Simeigo aya da, 5tama Simei te Maikago aya, tama Maika te Reaiago aya, tama Reaia te Balgo aya da, 6tama Bal te Berago aya. Te Bera te Ruben hanide tobolu bidi me deli da, tama Tiklat Pileser, te Asiria kingo, aga te kalabus sela pai dao. c
7Te Rubengo bulali deli hani dabe, te polalubo tobolu bidi dabego nogi e tama da. Hasia bidi Jeiel, te gasa si me elalubao, Sekaraia, 8me Bela da. Bela te Asasgo ogwa, tama Asas te Semago ogwa, te Sema Joelgo ogwa da. Te Belago hani dabe augwali te taun Aroerde bidali, te Aroer not badu tǫde bidada pali, te Nebo taunba usu nama, te Balmeon taun dąį igi pai dao. 9Augwali te tǫ pedai Gileat badu bidalu, tama augwaligo bulmakau me sipsip hauwa umabo pedelalio. Tibaso, augwali meba pelama, te giliga pedalubo badu te wa pai bulu tǫde bidali, te wa pai bulugo dąį pali te wę Yufretisba usu nigi pai dao.
10Te Sol king bidali sogo, te Rubengo hanigo te Hagar hani dali boi hwįnama, te augwali ela muai. Tama Ruben hani dabego te Hagar hani dabego tǫ selama, tama augwaligo te bulude augwali bidalio. Te tǫ pedai te giliga pedalubo badu te Gileat tǫ pedai badu elaluai dao.
Gat hani
11Te Gatgo hani dabe te Basan tǫ pedai te not badu te Ruben hani bidali badu pąde bidali. Te augwaligo tǫ dąį pali te taun Saleka te giliga pedalubo badu usu nigi pai dao. 12Te Gatgo deli hani bage meba te Basan tǫ pedaide bididubadi te bidi Joel hasia polaluali, tama te Safam si wabo bidi bidali, tama te tobolu bidi si Janai dali Safat dali si bidali.13Te Gatgo deli hani te gasa ayago ame nani hani te 7 te tama hani me bidali. Augwa nogi da e tama da, Maikel, Mesulam, me Seba, me Jorai, me Jakan, me Sia, me Eber dao. 14Te hani augwa bulali wąį nǫų da te Abihail, te Hurigo ogwa da. Tama Huri te Jaroago ogwa, tama Jaroa te Gileatgo ogwa, tama Gileat te Maikelgo ogwa, tama Maikel te Jesisaigo ogwa, te Jesisai te Jadogo ogwa, tama Jado te Busgo ogwa da. 15Te hani augwaligo polalubo tobolu bidi da te Ahi da, te Apdielgo ogwa te Gunigo wąį nǫų dao. 16Te a naga olama me si hani augwali te Gileat me Basan tǫ pedai te taun dabede me te pąde dwasianu bulu dabede bidali, tama me augwali te tǫ Saronde bidai, te tigidali bulude te bulmakau me sipsipgo tuabo wiegi yai nosai dabe elalualio. 17Te Gat hani dabe nogi asęani bidi dabego king Jotam te Juda king bidali sogo me te Jeroboam te Israel king bidali sogo te asęai dao.
Ruben me Gat me Manase augwaligo te boi bidi dabe aiyaba elaluai
18Te Israel dabe augwali te wę Jordan te giliga pedalubo badu bidali, te Ruben hani me Gat hani me Manase hani me badu bidali, augwaligo ami bidi dabe te bidi sese hauwa umabo mu, te 44,760 bidi dabe bidali. Augwaligo te boi hwįbo sabele tulama, te hwą bainatgo hwįbo mu konea pai bidi dabe da, tama augwa te enesigigo enebo sę me mu konea palio. 19Augwali pelama, te Hagar, me Jetur, me Nafis, me Nodap hani dabeba boi hwįgi pai dao. 20Te boi hwįgi pabo sogo te Israel dabe augwaligo Godiba gedu haluasa po weyu hanalu te augwali tau somainu yali. Tama Godigo augwali tau mu selama, tama augwaligo te boi bidi dabe aiyaba elaluali. Te Israel dabego homu kolesaga bomo elama, te Godigo augwali tau somainu ebaso, tialima agai augwali tau salio. 21Te Israel dabe augwaligo te boi bidi dabego hasa sibi dabe salio. Augwaligo te bidi sese hauwa umabo 50,000 kamel sobadi, te 250,000 sipsip sobadi, te 2,000 donki me salio. Tama me augwaligo te boi we bidi dabe bidi sese hauwa mu 100,000 boi bidi dabe sali. 22Tiali goli te augwali boi hwįani sogo te boi bidi hauwa isali, magi baso meni, God aga digi te hwįbo tonalualigo te tama tialio. Tama nosali te Israel dabego te boi bidi dabego tǫ augwa selama bidali. Tama augwali te tǫde bidada pidubadi, te gasa boi bidi dabego te Israel dabe gasa tǫ kantriba kalabus sela pali sogoba usu nai dao.Manasego hani me badu
23Manasego hani me badu genuai mu bidali. Augwali tǫ pedai distrik Basan badu bidali, tama augwali bidali bulu tǫ dąį te not badu te taun Balhermon buluba usu nama pali, te bulu du Senirba me Hermon bulu du dąį igi pai elaluai dao.24Te augwali hanide tobolu bidi bidali bidi dabego nogi da e dao, Efer, Isi, Eliel, Asriel, Jeremaia, Hodavia, me Jadiel dao. Te tobolu bidi dabe te wiegi yai ami dabe te genuai nogi elalualio.
Ruben me Gat me Manase te hani augwali te Asiriaba kalabus pai
25Ruben, me Gat, me Manase te hani sela augwaligo te augwa wąį nǫųgo Godigo po sela sąnama, augwa dwai sę yali. Tama augwaligo te bulude polobadu bidali bidi hanigo tibo godiba lotu po walio. Te Israel augwali te tǫba sabolali sogo, Godigo te tǫde bidali gasa hani bage sela sąwani. Tialima megi da, te Israel dabego God tagalali, te wego aga bidi tagalama subigila bidi hauwa dali penani sę ela bilibo tiwai yalio. 26Tama tialima, Israelgo Godigo te Asiria king bidi Pul homu hodolali, te aga gasa nogi me Tiklat Pileser wali. Tama te Asiria dabego te Israel dabeba boi hwįagaselama, te augwali aiyaba elalualio. Tama te Asiria dabego augwali selama, te Hala tǫba kalabus mugi pali, te Habor tǫba me, te wę Gosan pąde te Hara bulu du pesageba pali. Tama augwali tede bidalubadi, te e buku asęani bidi bidali sogoba usu nai dao. d
Copyright information for
MPS